O Concello de Xove anima a participar no XL Festival de San Bartolo, unha das grandes citas co folclore das festas patronais.

Cardioprotección no Concello de Xove

Detalles

CONCELLO DE XOVE

Creado en Viernes, 07 Agosto 2026 08:30

Última actualización en Viernes, 07 Agosto 2026 08:31

Publicado el Viernes, 07 Agosto 2026 08:30

Xove convértese nun dos concellos máis cardioprotexidos de Galicia coa incorporación de tres novos desfibriladores de última xeración
O Concello de Xove vén de reforzar de maneira significativa a súa rede de cardioprotección coa adquisición de tres novos desfibriladores automáticos Mindray de última xeración, nun investimento de arredor de 4.000 euros. O material foi entregado por Camilo, de Emergal Ensino, S.L de Mondoñedo. Na entrega estiveron o alcalde Demetrio Salgueiro e as concelleiras Dolores Meitín, Cristina Iglesias e Cecilia Duarte.
A adquisición a parte dos tres desfibriladores, inclúe tamén dúas bolsas de intervención equipadas con parches e mascarillas para actuacións de emerxencia.
Con esta incorporación, o Concello completa a cobertura existente, que xa contaba con dous desfibriladores: un situado na Piscina Municipal e outro no vehículo dos vixiantes municipais, co obxectivo de poder desprazalo rapidamente a calquera punto onde sexa necesario.

Os tres novos equipos distribuiranse do seguinte xeito:
Un desfibrilador fixo no Salón de Actos Municipal, un espazo que acolle numerosos eventos con gran afluencia de público.
Outro desfibrilador fixo no Pavillón Municipal, onde se desenvolve unha intensa actividade deportiva e social durante todo o ano.
Un terceiro equipo irá nunha mochila portátil de emerxencias, para dar cobertura ás festas, eventos culturais, deportivos e demais actividades que se celebren nas diferentes parroquias do municipio.
Estes desfibriladores destacan por ser dos máis modernos do mercado. Son totalmente automáticos e capaces de detectar de maneira automática se o paciente é adulto ou infantil, sen necesidade de cambiar os parches, o que permite unha actuación máis rápida, sinxela e eficaz en situacións de emerxencia.
O Concello de Xove conta xa con persoal formado para o manexo destes dispositivos e, ademais, impulsará novos cursos de formación dirixidos a asociacións, clubs e colectivos do municipio, co propósito de que cada vez máis persoas saiban actuar correctamente ante unha parada cardiorrespiratoria.
Con este novo investimento, Xove reforza o seu compromiso coa seguridade e coa saúde pública, consolidándose como un referente en cardioprotección e garantindo unha maior cobertura en todo o territorio municipal, tanto nas instalacións municipais como nas festas e eventos que se desenvolven ao longo do ano.

Festas de San Pedro Fiz (Xuances) 2026

Detalles

CONCELLO DE XOVE

Creado en Lunes, 03 Agosto 2026 10:25

Última actualización en Lunes, 03 Agosto 2026 10:26

Publicado el Lunes, 03 Agosto 2026 10:25

As festas patronais de San Pedro Fiz en Esteiro celebraranse os días 8 e 9 de agosto cun completo programa de actividades para tódolos públicos.

O Concello de Xove anima á veciñanza e ás persoas visitantes a participar nas festas patronais na honra a San Pedro Fiz, que se celebrarán os días 8 e 9 de agosto no campo da festa situado nas inmediacións da praia de Esteiro, un dos areais máis fermosos e concorridos do municipio, distinguido ademáis coa Bandeira Azul pola calidade das súas augas.
A programación dará comezo o sábado, 8 de agosto, ás 10:00 horas, co tradicional lanzamento de bombas de palenque, anunciando que Esteiro está de festa. Ás 14:00 horas celebrarase a sesión vermú, amenizada polo Grupo Lecer.

Xa pola tarde, ás 20:00 horas, terá lugar a tradicional Festa da Empanada e do Bolo Preñado, unha cita gastronómica que estará acompañada pola música dos gaiteiros da Asociación Cultural Saíñas de Xove.
A partir da noite, a música será a gran protagonista cunha verbena amenizada polo Grupo Lecer e a Orquestra Sinfonía, garantindo unha noite de festa e diversión para tódolos públicos.
Como broche á xornada, á medianoite celebrarase o tradicional Conxuro da Queimada, seguido dunha degustación gratuíta para tódalas persoas asistentes.
As celebracións continuarán o domingo, 9 de agosto, cunha misa solemne ás 13:00 horas na capela de San Pedro Fiz (Ceranzos), que contará coa participación do Coro de Valdeflores. A continuación terá lugar a tradicional procesión, acompañada musicalmente polos gaiteiros da A.C. Saíñas de Xove.
A festa trasladarase de novo ao campo da festa, fronte á praia de Esteiro, onde ás 14:30 horas dará comezo unha gran sesión vermú amenizada polo Dúo Son de Festa, poñendo o punto e final a unha fin de semana marcada pola música, a gastronomía, a tradición e a convivencia.
Estas festas están organizadas pola Asociación de Veciños San Pedro de Xuances, cuxos integrantes levan semanas traballando con ilusión e dedicación para que todo se desenvolva á perfección. A entidade quere agradecer expresamente a colaboración da veciñanza, dos comerciantes e de todas aquelas persoas que contribúen ao bo desenvolvemento desta celebración na parroquia.
Pola súa banda, o Concello de Xove, como entidade colaboradora, quere recoñecer o importante labor que realiza a Asociación de Veciños San Pedro de Xuances na conservación e recuperación desta festa tradicional, exemplo do compromiso co patrimonio cultural e co dinamismo do rural.
O Concello convida á veciñanza e ás persoas que visiten a comarca durante esas datas a achegarse a Esteiro para gozar dunhas xornadas de boa gastronomía, excelente ambiente e música, nun enclave paisaxístico privilexiado, onde a harmonía, a convivencia e a hospitalidade volven converter esta celebración nunha das citas festivas máis especiais do verán no municipio.

Festas de Sumoas 2026

Detalles

CONCELLO DE XOVE

Creado en Lunes, 27 Xullo 2026 10:44

Última actualización en Sábado, 01 Agosto 2026 14:52

Publicado el Lunes, 27 Xullo 2026 10:44

Sumoas celebrará do 31 de xullo ao 2 de agosto as súas festas parroquiais na honra a San Antonio.

A parroquia de Sumoas, no concello de Xove, celebrará os vindeiros 31 de xullo, 1 e 2 de agosto as súas tradicionais festas na honra a San Antonio, cun amplo programa de actividades relixiosas, gastronómicas e musicais pensado para reunir á veciñanza e aos numerosos visitantes que cada ano se achegan a esta cita festiva.

As celebracións darán comezo o venres, 31 de xullo, cunha gran churrascada popular a partir das 20.30 horas no campo da festa, situado nas inmediacións da igrexa de Sumoas. A continuación celebrarase a verbena, amenizada polo Dúo Belinda e o Grupo Los Adrianos.

O sábado, 1 de agosto, será a xornada central das festas. Ás 13.00 horas terá lugar a misa solemne e a tradicional procesión na honra ao santo patrón. Ao remate dos actos relixiosos celebrarase a sesión vermú co Grupo Folixa, que tamén será o encargado de animar a verbena da noite xunto ao DJ Conxuro, nunha noite de música e diversión.

As festas concluirán o domingo, 2 de agosto, cunha gran sesión vermú amenizada polo Dúo Epok, poñendo o broche final a tres días de celebración.

A organización destas festas corre a cargo da Asociación de Festexos Rodraguel, que quere agradecer expresamente a colaboración de toda a veciñanza, dos comerciantes de Xove e de todas aquelas persoas que fan posible a celebración destas patronais ano tras ano. Así mesmo, a asociación convida a veciños e visitantes a achegarse a Sumoas para compartir un ambiente festivo, familiar e de convivencia.

Pola súa banda, o Concello de Xove, colaborador na organización das festas, quere felicitar á comisión de festas polo traballo e esforzo realizado para sacar adiante esta celebración e anima a toda a cidadanía e aos visitantes a participar e desfrutar dunhas festas que forman parte do patrimonio cultural e social do municipio.

As festas de Sumoas volverán converterse, un ano máis, nun punto de encontro para familias e amigos, mantendo viva unha celebración con fonda tradición na parroquia e contribuíndo á dinamización social e cultural do municipio de Xove.

Festas de Lago 2026

Detalles

CONCELLO DE XOVE

Creado en Jueves, 16 Xullo 2026 13:22

Última actualización en Jueves, 16 Xullo 2026 13:23

Publicado el Jueves, 16 Xullo 2026 13:22

Lago xa está preparado para vivir as súas festas patronais. Os días 17, 18 e 19 de xullo, no Campo da Festa de Lago será o punto de encontro para celebrar por todo o alto as festas na honra da Virxe do Carme e San Antón.

XIII FESTA DO PERCEBE EN XOVE

Detalles

CONCELLO DE XOVE

Creado en Miércoles, 08 Xullo 2026 11:26

Última actualización en Miércoles, 08 Xullo 2026 11:27

Publicado el Miércoles, 08 Xullo 2026 11:26

A XIII Festa do Percebe celebraráse o vindeiro 18 de xullo en Xove cunha completa xornada gastronómica e festiva.

A Asociación de Festexos A Medorra organiza un ano máis a XIII Festa do Percebe, unha cita xa consolidada no calendario estival do municipio e que terá lugar o vindeiro sábado 18 de xullo na praza do Centro Cívico de Xove.

A xornada dará comezo ás 12.00 horas co acto inaugural e o pregón, que nesta edición correrá a cargo da conselleira do Mar, Marta Villaverde, quen será a encargada de abrir oficialmente unha festa dedicada á exaltación dun dos produtos máis apreciados da nosa costa.

Ao longo de toda a xornada, veciños e visitantes poderán degustar percebe de excelente calidade, procedente das nosas costas, recoñecido polo seu extraordinario sabor e pola súa frescura, converténdose nun dos grandes protagonistas gastronómicos do verán mariñán.

O ambiente festivo estará garantido coa animación musical de Os Charangos de Neda e do grupo de cantos de taberna Espera que vou mexar, que percorrerán o recinto enchendo a xornada de música, alegría e bo ambiente.

A comisión organizadora pretende poñer en valor un produto tan emblemático como o percebe e convida a toda a veciñanza e aos visitantes que se acheguen a Xove durante esa fin de semana a participar nesta celebración, degustar un dos mellores percebes das nosas costas e desfrutar dunha xornada marcada pola boa gastronomía, a música e a convivencia.

A XIII Festa do Percebe será, unha vez máis, unha excelente oportunidade para promocionar a riqueza mariñeira e gastronómica do noso litoral e para vivir unha xornada festiva na que Xove volverá ser punto de encontro para todos os amantes da boa mesa e das tradicións.

Festas de San Pedro de Xuances (Sábado, 27-Xuño-2026)

Detalles

CONCELLO DE XOVE

Creado en Jueves, 25 Xuño 2026 08:46

Última actualización en Jueves, 25 Xuño 2026 08:47

Publicado el Jueves, 25 Xuño 2026 08:46

O alcalde de Xove Demetrio Salgueiro, a concelleira de Servizos Sociais Tamara Soto e a primeira tenente de alcalde Mª Dolores Meitín, acompañados por membros da directiva da Asociación de Festexos Alto do Cruceiro: Rubén Sánchez e Alex Quintas, presentaron o cartel da festa de San Pedro, que se celebrará este sábado 27 de xuño no campo da festa do Cruceiro.

Esta celebración supón a recuperación dunha verbena moi querida pola veciñanza da parroquia de Xuances, que levaba case 30 anos sen celebrarse. A iniciativa da Asociación de Festexos Alto do Cruceiro foi recibida con gran satisfacción polos veciños e veciñas, que ven nesta recuperación unha oportunidade para volver compartir unha das citas festivas máis tradicionais da parroquia.

A programación dará comezo o sábado na igrexa de Xuances cunha misa solemne e a posterior procesión na honra de San Pedro. A continuación celebrarase a sesión vermú, que servirá de punto de encontro para os asistentes nun ambiente festivo e familiar.

Xa pola tarde, os actos continuarán cunha festa da cervexa e unha pancetada popular, con prezos populares para facilitar a participación de toda a veciñanza e visitantes.

A xornada rematará cunha gran verbena nocturna amenizada polo Dúo Belinda e por DJ Tomás, que serán os encargados de poñer a música e o baile ata ben entrada a noite.

Desde a comisión organizadora quixeron destacar o esforzo realizado para recuperar esta festa e agradecer a colaboración de todas as persoas e empresas que fixeron posible a súa volta. Así mesmo, convidan a toda a veciñanza de Xove e aos visitantes da comarca a achegarse ao Cruceiro para gozar dunha xornada de celebración, convivencia e compañeirismo nun ambiente agradable e festivo.

Festa de Interese turístico de Galicia “San Antonio da Rigueira”

Detalles

CONCELLO DE XOVE

Creado en Lunes, 08 Xuño 2026 08:21

Última actualización en Lunes, 08 Xuño 2026 08:23

Publicado el Lunes, 08 Xuño 2026 08:21

O Concello de Xove presenta unha nova edición da Festa de San Antonio da Rigueira e amosa a súa satisfacción e ilusión ante a chegada dunha nova edición da Festa de San Antonio da Rigueira, unha celebración declarada Festa de Interese Turístico de Galicia dende o ano 2023 e que constitúe un dos grandes referentes festivos e culturais da comarca.

O vindeiro sábado, 13 de xuño, veciños, veciñas e visitantes volverán reunirse nunha xornada na que se mesturan tradición, devoción, música, gastronomía e, sobre todo, o espírito de convivencia que caracteriza esta romaría.

Na presentación oficial do cartel participaron o alcalde de Xove, Demetrio Salgueiro; a concelleira de Cultura, Dolores Meitín; a concelleira de Turismo e Medio Ambiente, Cecilia Duarte; así como representantes da comisión de festas, José Antonio García Fernández e Juan José García Sánchez.

O San Antonio da Rigueira é unha festa con fondas raíces históricas e cun enorme valor sentimental para os veciños e veciñas da parroquia e de todo o municipio. Cada ano son centos as persoas que se achegan para participar na celebración, tanto da comarca como doutros puntos de Galicia e Asturias, atraídas pola singularidade desta tradición.

O Concello quere convidar a toda a cidadanía a achegarse ese día á Rigueira para vivir o ambiente festivo, desfrutar das actividades programadas e contribuír a manter viva unha celebración que forma parte esencial da identidade e do patrimonio cultural de Xove.

O desexo da organización é que o bo tempo acompañe e que esta edición volva converterse nunha xornada inesquecible.

A romaría ao San Antonio Ventureiro da Rigueira foi durante décadas unha das celebracións máis coñecidas de Galicia, ata o punto de que moitas persoas de Galicia e Asturias identificaban o municipio de Xove con esta festa. Consciente da súa importancia cultural e social, o Concello iniciou no ano 2009 un proxecto de recuperación da romaría, devolvéndolle o protagonismo que tradicionalmente tivera en todas as parroquias do concello, consolidándose como unha das celebracións máis representativas do municipio.

XXVIII EDICIÓN DA FEIRA CABALAR DE LAGO

Detalles

CONCELLO DE XOVE

Creado en Martes, 12 Maio 2026 08:36

Última actualización en Martes, 12 Maio 2026 08:36

Publicado el Martes, 12 Maio 2026 08:36

O VINDEIRO DOMINGO 17 DE MAIO TERÁ LUGAR A XXVIII EDICIÓN DA FEIRA CABALAR DE LAGO.

A Asociación Equina A Medela celebrará o vindeiro domingo 17 de maio a XXVIII edición da súa tradicional Feira de Gando Cabalar, unha cita xa consolidada no calendario festivo e ecuestre da comarca e que cada ano reúne a numerosos criadores, afeccionados ao mundo do cabalo e visitantes chegados de distintos puntos da provincia.
A feira desenvolverase ao longo de toda a xornada nunha pista especialmente acondicionada polo Concello de Xove nas inmediacións do Centro Social de Lago, espazo que volverá converterse no centro da actividade cabalar durante este importante encontro.
Entre as 9:30 e as 10:45 horas terá lugar a apertura do recinto feiral para a presentación dos participantes e as correspondentes medicións dos cabalos inscritos.
Ao longo da mañá e tamén durante a tarde celebraranse distintos concursos e exhibicións, nos que os asistentes poderán desfrutar da beleza e calidade dos exemplares participantes, así como do ambiente festivo e tradicional que caracteriza esta feira.
Ademais, ao mediodía, as persoas afeccionadas ao mundo do cabalo poderán compartir unha animada sesión vermú que contribuirá a amenizar a xornada e favorecer a convivencia entre participantes, visitantes e organización.

Desde a Asociación Equina A Medela destacan a importancia de manter viva esta tradición, que serve non só para promover o sector equino, senón tamén para dinamizar a vida social e cultural da contorna. A entidade organizadora agradece igualmente a colaboración do Concello de Xove e o apoio de todas as persoas e colectivos que fan posible a celebración desta XXVIII edición.
A organización anima a toda a veciñanza e ao público en xeral a achegarse ata Lago para desfrutar dunha xornada dedicada ao mundo do cabalo, á tradición e á convivencia.