Campamento en Morás 2025

05/Agosto/2025 Oficina Municipal Información Xuvenil oix@xove.es
• 

Durante os días 4, 5 e 6 de agosto un grupo de 33 nenas e nenos, de idades comprendidas entre 9 e 16 anos, gozan duns días de campamento en Morás. Esta actividade está encadrada dentro de Xuventude no Programa de Verán do Concello de Xove.
Nestes tres días, dende a saída o luns ás 11:00 ata o regreso o mércores ás 20:00 horas, teñen un plan intenso e variado de actividades en contacto estreito coa natureza que comprende desde a montaxe e a desmontaxe do campamento, surf na praia de Esteiro, kaiaks, xogos acuáticos, festa da escuma, xincana e moitos xogos máis para o máximo goce da rapazada participante.
Esta actividade está organizada polas Concellerías de Xuventude e Deporte e a Oficina de Información Xuvenil.

Festas de San Pedro Fiz en Xuances

05/Agosto/2025 CONCELLO DE XOVE
• 

Este fin de semana tócalle o turno á parroquia de Xuances, que este ano recupera a suas festas. O vindeiro sábado 9 de agosto e o domingo día 10 son as festas na honra a San Pedro Fiz e as inmediacións da praia de Esteiro van formar parte do escenario perfecto para estas festas parroquiais.
A Asociación de Veciños San Pedro de Xuances, con Daniel Alonso, José Meitín e Eleodora López como membros da directiva desta comisión organizadora, fixeron a presentación do cartaz acompañados polo Alcalde de Xove Demetrio Salgueiro e a concelleira de cultura Mª Dolores Meitín, invitando aos visitantes e a toda a veciñanza a pasar unhos días de convivencia e diversión garantizadas.

AQUAPARK CERCEDA 2025

04/Agosto/2025 Oficina Municipal Información Xuvenil oix@xove.es
• 

O sábado, día 2 de agosto, ás 9:30 horas, 34 mozas e mozos de Xove de entre 12 e 18 anos, desprazáronse ó Aquapark de Cerceda acompañados polas técnicas de xuventude Mónica López Sanjurjo e Silvia Rodríguez Barreiro, para gozar das diferentes piscinas e tobogáns que ofrece este parque acuático.
Esta viaxe está organizada polas Concellerías de Xuventude e Deporte e a Oficina de Información Xuvenil dentro do programa “Verán Xove 2025” .

Festas en Sumoas 2025

31/Xullo/2025 CONCELLO DE XOVE
• 

A Asociación de Festejos Rodraguel de Sumoas invita a veciños e visitantes a acercarse este  fin de semana a gozar das  festas patronais da sua parroquia, na honra a San Antón, empezando xa o venres día 1 de agosto con unha gran churrascada.

Hoxe tivo lugar a presentación do cartaz onde estivo presente Leandro Quelle e José Manuel Franco como membros da comisión organizadora, acompañados polo alcalde de Xove Demetrio Salgueiro e a concelleira de cultura Mª Dolores Meitín.

Festas de Lago 2025

17/Xullo/2025 CONCELLO DE XOVE
• 

  Festas de Lago 2025 na honra á Virxe do Carme e San Antón

Na presentación estivo o alcalde de Xove Demetrio Salgueiro e a primeira tenente de alcalde Mª Dolores Meitín, acompañando a Andrés Prieto e Modesto Rodriguez como membros da Asociación de Festexos A Granda que organiza estas festas.

Mañá venres 18 xa arranca a programación con unha gran churrascada a partir das 8 da tarde.

Axudas ó estudo 2025

15/Xullo/2025 Departamento de Servizos Sociais
• 

Aberto o prazo, ata o día 5 de agosto de 2025, para solicitar as axudas ao estudo do Concello de Xove nas seguintes modalidades:

A) Gastos de comedor para: Estudantes de ensinos en centros públicos da comarca da Mariña que precisen comer fóra de Xove a causa dos seus horarios, cando ditos estudos, aos que se refiren as bases, non sexan impartidos nos centros de ensino do Concello de Xove.

B) Gastos de estancia para:

1. Estudantes universitarios en universidades españolas.

2. Estudantes de ciclos formativos que non existan na comarca.

3. Estudantes de ensinos artísticos, profesionais e superiores e de ensinos deportivos, profesionais e superiores.

C) Gastos de desprazamento para:

1.- Estudantes que cursen estudos existentes en San Cibrao, Viveiro ou Burela, cando o seu horario escolar non sexa compatible coa liña regular de transporte de viaxeiros.

2.- Estudantes de ciclos formativos en centros da Mariña Lucense, agás os recollidos no punto anterior.

3.- Estudantes que cursen estudos existentes en San Cibrao ou Burela, e que o regreso só dispoñan de transporte regular ata Xove e non ata a súa parada de orixe, por incompatibilidade da liña de transporte de viaxeiros.

4.- Estudantes de ciclos formativos que non existan na comarca.

5.- Estudantes de ensinos artísticos, profesionais e superiores e de ensinos deportivos, profesionais e superiores.

6.- Estudantes universitarios en universidades españolas.

Mais info:  Departamento de Servizos Sociais: 982 592 001

Bases Reguladoras

Visita do Conselleiro de Cultura as Ruinas de San Tirso.

14/Xullo/2025 Concellería de Deporte e Turismo
• 

José López, Conselleiro de Cultura, Lingua e Xuventude visitou o noso Concello, estivo nas ruinas de San Tirso, acompañado polo alcalde Demetrio Salgueiro, a concelleira de cultura Dolores Meitín, a concelleira de Turismo Cecilia Duarte e o edil Manuel Ángel Meitín, onde se van levar a cabo traballos arqueolóxicos grazas ó convenio de colaboración que firmou co Concello de Xove, cunha aportación de 25.000€, para acometer próximamente unha actuación arqueolóxica de excavación e conservación en San Tirso en Portocelo, un enclave composto polo castro de Mechiluide e a antiga igrexa.

Deste modo, tal e como explicou sobre o terreno o conselleiro, “pretendemos favorecer a súa posta en valor e tamén o coñecemento deste sitio arqueolóxico para avanzar na súa investigación e caracterización”.

Bandeira Azul: Praia de Esteiro ´2025

09/Xullo/2025 CONCELLO DE XOVE
• 

Comprácenos anunciar que a praia de Esteiro do Concello de Xove, recibiu unha vez máis, o pasado 04 de xuño, de mans do Presidente da Xunta, Alfonso Rueda, a prestixiosa Bandeira Azul; un símbolo que destaca o compromiso coa calidade medioambiental, a sostenibilidade e a seguridade nas nosas costas.

A adxudicación da Bandeira Azul impulsa a imaxe de Xove como destino turístico e natural de referencia, atraendo a un público que valora a sostenibilidade na xestión ambiental.

No acto de izado da bandeira, que tivo lugar no día de ontes, estiveron o Alcalde Demetrio Salgueiro e a Concelleira de Turismo e Medio Ambiente Cecilia Duarte, xunto ao xerente de Esteiro Surfing e Surf Café, Nacho, o monitor de surf Xoel e os socorristas José Ramón e Brais, que cada ano vixían e coidan o benestar da praia e dos milleiros de visitantes que a ela acoden.

Día para celebrar este logro que pon en valor o esforzo colectivo por manter os nosos espazos naturais en perfecto estado. A Bandeira Azul é un distintivo internacional, que recoñece a aquelas praias e portos deportivos que cumpren con rigurosos criterios de calidade en áreas como a limpeza, a accesibilidade e os servizos de conservación do entorno natural.

Este recoñecemento non só é un motivo de orgullo para o municipio de Xove, senon que tamén destaca o esforzo continuo da administración local e a colaboración dos cidadáns na preservación e millora das nosas praias.

Tamén se izou a Bandeira do programa "Praias sen fume", consolidando así o noso compromiso coa saúde pública e a protección do medio ambiente. A iniciativa busca fomentar espazos libres de fume en contornas naturais, especialmente nas zonas costeiras máis frecuentadas durante os meses de verán. A sinalización da praia como espazo sen fume ten carácter voluntario e educativo, e non leva aparellada sancións, preténdese, sobre todo, sensibilizar á cidadanía sobre os efectos nocivos do tabaco e reducir a presenza de cabichas na area, un dos residuos máis contaminantes e difíciles de eliminar.

Dende o Concello de Xove, agradecemos o apoio de todos aqueles que fan posible que a praia de Esteiro siga sendo un referente de calidade e sostenibilidade.

Invitamos a todos a desfrutar deste marabilloso entorno natural e a seguir contribuíndo ao seu coidado.